1Cor 11 | KYG | STEP | Kalaisi'mo akame nehuva kava hutapa nakame hiyo.

1 Corinthians 11

1 Kalaisi'mo akame nehuva kava hutapa nakame hiyo.

A'nemogimo anau'apimogi apaiyafi'mo maisayafe'mo apakenopale'mo ai'a ati nekaya kavafe'mo hu'niya gemae

2 Lapakaemo muki afina'mo nagaefe'mo lapakesamo afitetapa ali'na lapaya malete'na ali'na lapami'nova gemo akame nehaya'mofe'mo lapao ke he'nae'mo, alagepa kava'mo nehae, hu'na nehuve. 3 Nehuva'monanafa mago gemo afisayafe'mo nahau'niye. Goti'a Kalaisi agenopagana huno mai'neno'ae'mo yagaino ne'ate. Kalaisi'a muki Kalisitini ve anaga'ai apakenopagana huno mai'neno yagaino ne'apate. Vemogimo a'ne anaga'ai apakenopagana hu'a mai'ne'apae'mo yagai'a ne'apatae. 4 Muki ve anaga'mogimo apakenopale'mo ai'a ati kaeli'ne'a nunumu huge Goti ge'amo ae'a hakalo hu'a hapa paige nehisayana apakai'apimo apavagage ya'mo ali'a ne'apamiye. 5 Muki a'ne anaga'mogimo apakenopale'mo ai'a ati okae'ne'a nunumu huge Goti ge'amo ae'a hakalo hu'a hapa paige nehisayana apakenopamo ali'a hosu hu'a ne'ataya'mofe'mo apavagage hisiya kava'mo hane'niye. Apayoka'mo he'a havavi hu'a atalesayana lusi kava huno apavagage hisiya kava'mo hane'niya kava huno apakenopale'mo ai'a ati nokaesayana apavagage hisiya kava'mo hane'niye. 6 A'nemogimo apakenopale'mo ai'a ati okaesayana apayoka'mo he'a havavi hu'a atalesaya kava'mo hane'niye. Apayoka'mo lagau'a atalete'a he'a havavi hu'a atalesayana apavagage hugiya'mofe'mo apakenopale'mo ai'a ati kaelisaya kava'mo hane'niye. 7 Vemo Goti aune'amo maige Goti ha le konali ya'amo maige hu'a mai'naya'mofe'mo apakenopale'mo ai'a ati okaesaya kava'mo hane'niya'monanafa a'nemo vemogi ha le konali ya'apimo mai'nae. 8 Vemo a'nefati'mo alo osu'nifa a'nege'mo vefati'mo alo hu'niya'mofe'mo vemogi ha le konali ya'apimo a'nemo mai'nae. 9 Goti'a ve kanomo'a a kanomo ha maesiyafe'mo alo osu'nifa a kanomoke'mo ve kanomo ha maesiyafe'mo alo hu'niye. 10 Hu'niya'mofe'mo enisole vaya'mogimo apakete'apae'mo, anau'apimogi ge'apimo afe'alumelaga ne'maiye, hu'a hisayafe'mo a'nemogimo apakenopale'mo ai'a ati kae'a alisaya kava'mo hane'niye. 11 A'nemogi apaiyafi'mo maigaya'monanafa Ala kava ne'mo'a, ve'age'mo o'maigae huno huge a'ne'age'mo o'maigae huno huge huteno'ae'mo vemogi a'nemo hapa maege a'nemogi vemo hapa maege hute'a magokepi'mo lokae'a maigae, huno hu male'niye. 12 A'nemo vefati'mo afole ai'naya kava hu'a vemo a'nefati'mo afole ne'aiya'monanafa muki kava'amo Gotitegatike'mo afole ne'aiye. 13 A'nemogimo vaya'ai apaulagale'mo apakenopale'mo ai'a ati okae'ne'a nunumu hisayana kanale hugifiye. Lapakaitapige'mo alita fako hutapa lapakesamo afiyo. 14 Ma mopafi kavafe'mo hutae'mo, Vemogimo yatala apayoka'mo hane'nisiyana apavagage hisiya kava'mo hane'niya'monanafa 15 a'nemogimo yatala apayoka'mo hane'nisiyana konali ya'apimo hane'niye, huta lagesa ne'afupiye. He, Goti'a ai'a ati kaesayafe'mo a'ne anaga'mo yatala apayoka'mo apami'niye. 16 Mago vaya'mogimo mani gelefe'mo ge vaigefe'mo nehisayana lagae'e muki Goti siosi'ale siosi'ale'mo mai'naya vaya'mogi'e'mo alu kava'mo nosune.

Ala kava ne'mo kave ne'ya'mo ne'naya kavafe'mo hu'niya gemae

17 Hemenimo mago kavatapie'mo lapa paigesuve. Mani kavafe'mo lapao ke he'nae'mo alagepa kava'mo nehae, hu'na nosuve. Alita anupa nehaya kavateti'mo alagepa kava'mo afole no'aifa hosu kavake'mo afole ne'aiye. 18 Hogote'na lapa pai'nae'mo, Mago vaya'mogimo, ali'a anupa hu'a ne'maiya afina'mo ali'a fako hu'a apaote apaote hu'a ne'maiye, hu'a naha pai'nage'nae'mo alagi lama gege'mo hu'negae, hu'na nagesamo afi'nove. 19 Fatago kava'mo nehaya vaya'mogi afole yategamo afole aisayafe'mo ali'a fako hu'a apaote apaote hu'a maisaya agufa kava'mo hane'niye. 20 Alita anupa hutapa mai'netapae'mo Ala kava ne'mo kave ne'ya'mo nesayafe'mo alagepa hutapa alita anupa hutapa no'maiye. 21 Lapakaemo afa ne'ya'mo negefe'mo mono nopi'mo alita anupa hutapa magokepi mai'netapae'mo apakava o'maitapa mago'amogitapamo malage hutapa alita ne'nae. Mago'amogitapamo lapaka tege mago'amogitapamo alopa ani'mo ne'netapa negi nagi kava'mo huge hutapa ne'maiye. 22 Notapifi'mo ne'ya'mo nege ani'mo nege hisaya notapimo ohane'nifiye. Hosu kava'mo hutapa ne'ya'mo ne'netapae'mo siosi vaya'aife'mo ina agufa vaya'mo mai'nae, huta hutetapa kagemi ya'apimo ohane'niya vaya'mo apavagage ya'mo alita ne'apamiye. Mani kavatefe'mo na agufa gemo lapa paiguve. Lapao ke he'nae'mo alagepa kava'mo nehae, hu'na hisufiye. Vaehae. Ani agufa gemo alagi osuguve.

23 Ala kava ne'mo'a naha pai'nige'na lapa pai'nae'mo, Ala kava ne'mo kutulu ya'mo ali'niya vekamo Yutasi'a avaleno apami'niya hani'ilagamo peleti mayamo ali'niye. 24 Ali'neno Gotife'mo hao ke heteno alino akaya heno ali'neno'ae'mo, manimona nagufa'nimo hane'niye. Lapakaetefe'mo ai'a atalagaugae. Hemenimo nagaefe'mo lapakesamo afitapa ho hisayafe'mo mani kava'mo hutapa netale netale hutapa maiyo, huno hapa pai'niye. 25 Ne'ya'mo ne'ne'apae'mo ani kava huno kapumo ali'neno'ae'mo, Mani kapufi hane'niya ani'mo kola'niye. Kola'nileti'mo saufa kotalakemo hu malesuva kola'nimo hane'niye. Muki afina'mo mani ani'mo ne'netapae'mo nagaefe'mo lapakesamo afitapa ho hiyo, huno hapa pai'niye. 26 Lapakaemo muki afina'mo mani peleti mayamo nege mani ani'mo nege nehutapae'mo Ala kava ne'mo fali'niya kavafe'mo ava gemo aetapa hakalo hume hume ne'visageno'ae'mo halate eminegaiye.

27 Ani kava'mo hane'niya'mofe'mo mago vaya'mogimo Ala kava ne'mo peleti mayamo ali'a negefe'mo hisaya afina'mo alagepa hu'a apakesamo o'afi'ne'a fiku ali'a nege Ala kava ne'mo kapufati ani'e'mo ali'a negefe'mo alagepa hu'a apakesamo o'afi'ne'a fiku ali'a nege hu'nisayana Ala kava ne'mo agufa'a'e kola'a'e'mo ali'a hosu hu'a ategae. 28 Vaya'mogimo hogote'a apamete apamete hu'a apakai'api apaipafi kava'apimo ali'a fako hu'a apatete'a alo hu male'ne'apaeke'mo peleti maya'e ani'e'mo ali'a nesaya kava'mo hane'niye. 29 Peleti maya'e ani'e'mo ne'ali'apae'mo Ala kava ne'mo agufa'ae, hu'a o'age'a fiku ali'a ne'nisaya'mo'mo apakai'apige'mo hanageke ya'mo aligae. 30 Lapakaepati'mo mago vaya'mogi ani kava hu'a fiku ali'a ne'naya'mofe'mo lokiya o'vaige kaita hapauge hu'nige'a mago vaya'amo ago fali'nae. 31 Lagaitige'mo laipafi kavatimo alita fako hisunageno'aeke'mo Goti'a alino fako huno lateteno kayo'mo olamigiye. 32 Goti'a ma mopafi vaya'mo agoti huno apateteno'ae'mo hosu kava'mo hu'nae, huno hisiya afina'mo apakaegi'e'mo magokepi lokaeta o'maisunafe'mo Ala kava ne'mo'a ago alino fako huno lateteno kayo'mo nelamiye.

33 Ani kavatefe'mo konaga'nimogitapamo Ala kava ne'mo kave ne'ya'mo negefe'mo alita anupa hutapa mai'netapae'mo konagatapimogife'mo apakava mai'netapa magokepi lokaeta mai'netapa ne'ya'mo neyo. 34 Mago vaya'amogitapamo lapaka tesigetapae'mo hogotetapa notapifi'mo ne'ya'mo neyo, Goti'a kavatapimo alino fako huno lapateteno kayo'mo olapamigiyanagi. Nagaemo lapakaetegamo u'nae'mo mago alu kava'atapimo ali'na api ai'na lapategauve.